星光大道黯淡了，上水行人路鬆動了，銅鑼灣空間失而復得了，這時候，失常的、慌了手腳的旅發局打算擲巨款大搞購物節「救亡」。五一黃金周臨近，幫勁跌三成的旅業還魂，可以考慮以下靈丹：
即刻在鬧市栽種櫻花。當然，花是救急的，當然不是真嘢，以假扮真，叫內地遊客「影住先」。櫻花大使也有人選了，樹根叔，日日企街飛擒大咬，娛樂性強。假櫻花是真棉花糖做的，沒放黑心豬油，富表妹食住先，唔會死人。
內地遊客最鍾意去宜家小睡，旅發局跟宜家合作，周街擺放沙發和雙人床，任瞓唔嬲。香港不單是好客之都，還是好瞓之城。唔係只有黃絲和月入14K的年青人才佔領街頭啊，陸客攞正牌，過足佔領癮。三人組和慈母們，親臨大派五月糭，跟遊客打成一片，點會衰過沙士呢？
最後，自由行之父梁振英出馬，向遊客派錢……喔不能講得太白……派糖救亡。闊佬不救亞視是政治決定，但有見識的闊佬，肯定爭住做旅遊業的白武士。坐在開篷解款車上的梁凸，面向鏡頭不斷撒銀紙，連澳門也做唔出，冇得輸。