練馬師同馬主，對待一啲貴價馬，當然會特別偏心啦，好似余國賢名下嘅「銀豐神駒」，乃2013年法國莊柏德大賽亞軍，肯定身價不菲，點知因傷患，來港近兩年仍未上陣，並已由高伯新轉投吳定強馬房；換轉其他馬，馬主可能早已申請退役，換過一隻來港。
高伯新雖然損失咗「銀豐神駒」，但佢旗下仍有唔少貴價馬，今期(12日)沙田賽事，就有匹「喜星寶」初次在港登場，列陣第十一場二班1600米。
「喜星寶」盛傳身價逾2,000萬港元，佢有幾巴閉？隻馬父系乃前世界馬王「海都之星」，來港前5戰1冠3亞1殿，係去年法國打吡亞軍，只不敵其後屢於一級經典大賽交出佳績的「幻想大亨」，水準絕對有保證。高伯新當初為馬主羅建生家族購入「喜星寶」，一心進軍打吡，可惜傷患問題，影響進度錯過打吡，不過家陣健康已完全好番晒，上月底試谷草1700米大閘，跟放直路加速透出，走勢強勁下掄元，已有作戰水準。
針織業巨子羅建生向來養馬運佳，過去曾有「喜勁寶」贏過唔少短途大賽，仲榮登香港馬王寶座，而現役之「喜喜寶」就響本月初後來居上，勇奪跑馬地百萬挑戰盃冠軍，可以話旺氣逼人。講番「喜星寶」，響外國有戴鼻箍贏馬，今次在港初出即用此配備，鬥志絕對毋須懷疑。