舊年政圈對下屆特首傳過「馬拉松」嘅講法，即係前商務及經濟發展局局長馬時亨，力撐老友前財爺梁錦松做特首。雖然肥馬舊年話阿松無意參選，但噚日又有新嘅講法。
肥馬噚日現身午餐會時被問到「馬拉松」時，竟然畀佢搵到位乘機推銷袋住先，話要跑馬拉松都要有跑道先，「聽講7月就知道條跑道起唔起得成」，擺明係講立法會7月表決政改啦！佢又話選手跑馬拉松之前都要「做啲熱身工作」，接住話本月23號港大有場金融人才論壇，正係肥馬做主持、阿松做講者。咁講法，係咪即係阿松做緊熱身呢？阿松前日先去完大學活動，拉近同青年距離，𠵱家肥馬又講得咁曖昧，相當惹人遐想喎！
陳智思讚民望高
同場嘅降低食物中鹽和糖委員會主席陳智思，就大讚諗呢個名嘅食衞局局長高永文叻叻豬，因為做咗主席後，唔少賓客見到佢會講笑話「呢餐唔可以冇鹽冇糖喎」，可見委員會引起大家關注。