昨日講起史丹福大學優惠中產階級，每年家庭收入低於十二萬五千美元嘅學生，可以免學費，當然，申請入讀史丹福，只有5%機會，入得嘅必定係考試、讀書尖子，如果佢地為咗經濟理由而入讀美國其他州立大學，攞獎學金一定十拿九穩，從呢個角度諗，史丹福提供學費優惠，係唔想流失一啲學生精英俾其他學校啫。我地香港人往往讀書求學校名氣，但美國人比較實際，往往要睇埋一個學位（degree）之「性價比」，所謂value for money，不一定盲目追求名氣嘅。
不過咁，在香港申請入讀史丹福，欲想提高入學機會，最好唔提申請獎助學金之類。名校通常要學生填表時選擇：（一）要，（二）不要財政援助（financial aid），如果填寫「要」，條隊就夠晒長咯，成績要加零一咁好先至有希望獲得取錄。過去幾年左丁山有幾位世姪女自史丹福畢業，佢地父母都係高薪專業人士，家庭收入超過十二萬五千美元，淨係睇女兒讀書在校及考SAT成績，係好有希望昂然進入史丹福嘅，但事前有彼邦人士俾貼士，如果填表時，講明不要financial aid，入學機會更加高啲，當然依計行事喇，因為排第二條隊（即不要財政援助）嘅學生人數會少啲吖嘛。
輔導學生申請入讀美國大學嘅，最初本是中學校長／老師嘅責任，但本地香港中學呢方面嘅（名校除外）經驗比較少，往往無意見俾到學生，令學生不懂竅門。隨住香港家庭愈益富裕（比起三十年前），輔導升學逐漸成為一門生意，如有窿路，近年更成為發達生意。窿路就係同內地有聯繫，有關係網啦，內地富裕家庭之多，超乎想像，而佢地對美國認識之淺，亦超乎想像，於是升學輔導成為一啲海歸派（特別係長春藤畢業生）之搵錢良方，收費往往要三至五萬美元一位，左丁山聽見，真係嘆息自己生長在香港溫室，以前不知道做升學輔導中介人都可以咁商業化。
現在已經係四月，美國各大學已經發出晒今年九月嘅入學通知，現在讀緊中五嘅學生就要預備暑假後申請美國大學嘞，考定托福，SAT當然係例行公事，還要寫定一份「入學目標書」（statement）（字數視乎大學要求），寫完一改再改，搵老師校長批改，指導，甚為必要。