追波都要講值博率講對手，仍信上仗敗走愛華頓嘅修咸頓，對爭踢來屆歐霸決心最足，今晚回主場迎戰近績最弱嘅「老虎」侯城，畀多次機會呢支英超唯一南軍，重心博[-1]復前失。
修頓上仗喺射門、中框同對手門將侯活撲球次數，都勝過主隊愛華頓下落敗，簡單講發揮未算太差；佢哋仲會慶幸爭第5名嘅對手，包括利物浦大敗予阿仙奴、熱刺喺般尼戰和，三隊上輪齊齊失分。修頓𠵱家跌落第七，只差利記同熱刺一分，但得失球有絕大優勢。睇番修頓餘下七場對手，唔係好強，最關鍵係本月尾迎戰熱刺。
好少領隊公開講好恨踢歐霸盃，爭緊足總盃嘅利記同已連踢四屆歐霸嘅熱刺，主理人應該冇乜所謂；但朗奴高文啱啱記招又提，修頓攞到第五，同其他強隊踢到歐聯嘅高興程度無異。只係啱啱輸一場，當國際賽後，隊波「魂魄」未返嚟，筆者從來唔怕追波。
「病虎」鋒線死晒火
相反，對手侯城上輪敗走史雲斯後，突然又亮起護級紅燈；計最近四場聯賽，呢隻「病虎」只得兩分，全個聯賽最頹。對跌至尾四嘅侯城最大鑊係，幾支下游隊嘅箭頭都撻番着，包括昆士柏嘅查理柯士甸、阿士東維拉嘅賓迪基同新特蘭嘅迪科爾，侯城呢？首席射手謝拉域繼續養傷，次席嘅艾保靴南迪斯，今季正選連後備踢咗21場波，僅得四個聯賽入球。就算主隊今戰要續出老後備門將加雲戴維斯，老虎都唔易破門。
修咸頓主W得1.41倍，可做過關鋼膽，單注當然要博[-1]；串射七連勝嘅阿仙奴作客般尼取2:1、3:1波膽，兵工廠最近三仗聯賽作客贏波都係開2:1，般尼鬥志高，前者唔易大勝。冇人信兵工廠會追到榜首車仔，但去年聖誕節佢哋仲落後曼城12分，𠵱家已反先對手兩分排次席，連原本水蛇春咁長嘅傷兵名單，𠵱家得番阿歷士張伯倫一件；車仔仲有幾場硬仗，包括4月26號決戰阿仙奴，兩隊波嘅積分，越近煞科會越貼。
車仔奪冠1.01倍，阿仙奴20倍，單打獨鬥格。冇可能追到？明日車仔作客護級心切嘅昆士柏，缺少王牌射手迪亞高哥斯達，主W有7.2倍，玩一票又如何？
波神
神級攻略 智破足彩