影射美國白宮政壇權鬥嘅美劇《House of Cards》（《紙牌屋》），最近似乎喺香港上演真人版本，場地卻唔係特首辦，而係喺蘇慶和揸fit做主席嘅市建局，事關自從行政總裁譚小瑩提早劈炮後，坊間就傳出連串佢兩位不和嘅消息，唔少人言之鑿鑿指同人事鬥爭有關，市建局非執董周光暉，更撰文形容事件有「謀權篡位、借刀殺人」嘅感覺，自稱可能係睇咗《House of Cards》而諗多咗。
傳有人篤背脊
其實自從譚小瑩劈炮消息傳出，政圈中人七嘴八舌講到「點只（與蘇慶和）睇法唔啱咁簡單？」有人聲稱，導火線係顧問報告針對嘅權力分配問題，譚小瑩唔like被削權，況且佢又唔係蘇慶和派系，加上盛傳有蘇系人士篤佢背脊，玩到咁絕，惟有唔do，總之花生指數爆晒燈。
連局內人周光暉都喺《蘋果》專欄寫出「個人分析」，話有人想謀權篡位，八方問佢邊個謀權、邊個篡位，暉哥話：「未必係佢哋兩個（蘇、譚）。」指蘇慶和退休後臨危授命上陣做義工，擺明冇野心；而譚小瑩既專業又有心，「如果以10度計，佢哋嘅不和，0.5度都冇。」咁顧問報告嘅分權問題係咪決裂導火線？佢咁回應：「斷咗症之後，梗係要對症下藥，大家都係想做好件事。」
言下之意，到底邊個煽風點火先？佢話成件事風波始於有「內幕人士」向傳媒爆料指譚小瑩會辭職，繼而話喎，成班做咗好耐嘅非執董都好和洽嘅，唔知有冇言外之意呢？
李八方
mailto:[email protected]