早前曾傳出杜如風姣媾郭子健，成為娛樂新聞頭條，今趟杜如風訪問郭子健及黃智亨（Henri），即時來一場「緋聞情侶」碰頭，好在中間夾着Henri緩和氣氛。杜如風一來就說：「《全力扣殺》喺做宣傳之前，導演（郭子健）已經全力扣殺咗我，食咗好大個波餅『杜如風姣媾郭子健當小三』，你平時話睇咗我啲旅遊節目，又話我係女神，點解變咗杜如風姣媾郭子健當小三？唔係郭子健姣媾杜如風。」郭子健明顯有備而來笑着說：「我哋呢啲微不足道。」Henri亦幫口：「佢擺明毒男，毒男好難姣媾……」杜如風當然不會輕易放過郭子健，最後迫得他當眾澄清話：「冇呀冇呀，杜如風冇姣媾我。」
開工遇靈異事
今次郭子健與Henri合作執導《全力扣殺》，更與林敏驄合作，原來是二人多年來的希望，Henri說：「林敏驄係我哋偶像，想合作好耐。以前佢做戲嘅角色都係搞搞震，我哋想拍到佢才子，滿肚墨水有才華嘅另一面比觀眾睇，要求佢唔可講順德話，又要除眼鏡。」另外，此戲在被喻為亞洲十大猛鬼地方的元朗達德學校取景，杜如風錄影此訪問時，其中一支燈亦無故燒了，郭子健說：「拍咗十五分鐘左右部機突然停咗，但奇就奇在將部機擰出去就開到。」如事者幾趟之後，製片取來一大紮香拜，郭子健說：「跟住我哋話『好快拍完，拍完就走』，咁真係OK喎拍到十分鐘，之後又開唔到。」之後所有工作人員一齊開口答應無論如何拍多十分鐘就離開，之後果然順利完成，然後各人就急急腳離開。