政圈一直有傳前財政司司長梁錦松，係下屆特首黑馬之一。噚日阿松出席城大一場午宴時，八方見佢非常風騷，開飯前先行勻全場，參觀學生嘅作品，對現場嘅機械人、互動裝置、展覽、電單車頭盔及手提電話座等等，一律聽得津津有味，甚至會落手落腳，玩埋一份，呢份親切感，𠱁得現場班年輕人好歡喜喎。
開飯之後，阿松就以新經濟時代下90後嘅就業機會為題發表演說，似乎想打年輕人牌喎。但佢個演說就四平八穩冇乜驚喜，都係叫啲年輕人利用好國家發展優勢、支持政改、反對港獨等等。但又唔恨得咁多喎，八方覺得台下嘅年輕人都幾受落，提問嘅幾位同學，都冇問啲好刁鑽嘅問題。雖然都係姓梁，但阿松嘅人緣，似乎好好多喎。