復活節長假期結束，但福建同永倫兩支甲一勁旅嘅「復活」之旅仲未完結，兩軍今晚8點40分喺灣仔修頓室內場上演銀牌負方決賽，爭入總決賽。衞冕嘅永倫喺勝方決賽以73:83不敵南華，今晚轉戰負方決賽對福建。雖然福建贏面較低，但教練梁國成仍信心十足︰「我已叮囑球員小心對手嘅防守轉快攻，同埋爭搶防守籃板，亦搵專人箝制前加拿大國手泰那。」有劉凱濤（左）「爆肺」後復出嘅福建，賽前傳嚟好消息，張偉康（右）啱啱喺消防訓練學校「出班」歸隊，配合劉子健同劉子禮兩名射手，望以三分雨淹沒「黃金戰士」。此外，同日七點頭場有女子高級組負方決賽，安青鬥均安。門票分40蚊同30蚊長者同學生票。