手機遊戲開發商Zynga，因為推出德州撲克與FarmVille兩個遊戲而聲名大噪，可惜後勁不繼，2013年搵來原本喺微軟負責Xbox嘅馬特里克（Don Mattrick），接替創辦人平卡斯（Mark Pincus）做行政總裁（CEO），諗住救亡，點知未夠兩年，平卡斯又重掌Zynga。
今次人事調動即時生效，平卡斯只要求一蚊美金嘅象徵式人工。佢話當年將公司交畀馬特里克時，公司真係唔係幾掂，多謝馬特里克喺關鍵時候加入Zynga，幫公司削減成本等；又話過去兩年有足夠時間思考，似乎有信心今次可令Zynga再創高峯。
不過Zynga自FarmVille後，都冇乜大熱新遊戲推出，直至舊年第四季都仲蝕緊錢。分析話Zynga太依賴facebook（fb）作為平台，當fb用戶轉玩其他遊戲，佢就大受打擊。所以話呢，大家真係唔好太依賴fb呀。