西甲爭標雙雄皇家馬德里同巴塞隆拿，周三齊齊贏波，前者喺聯賽榜繼續落後四分。皇馬今場作客華歷簡奴，贏得唔算輕鬆，踢到68分鐘先由C朗打破悶局，五分鐘後再由占士洛迪古斯取得傷癒後嘅首個入球，以2:0勝出，但慘就慘在呢兩位入波功臣同卻奧斯，都喺今場拎黃牌，累積夠五面，下場對伊巴要停賽。中前場一下子冇咗三位主力，但皇馬就幫C朗上訴，希望打甩張黃牌，如果唔成功，就睇吓加里夫巴利可唔可以趁C朗唔喺度，踢出身價波喇。
巴塞四球大炒艾軍
至於巴塞就繼續清風送爽，主場4:0大勝艾美利亞。MSN鋒線今場拆夥，尼馬做後備，由盛傳下季可能離隊嘅柏度洛迪古斯取代，但入波嘅都係美斯同蘇亞雷斯為主，美斯上半場先替巴塞建功領先，之後阿蘇下半場就發威入兩球，而中堅馬斯巴查亦有波入，繼續穩坐榜首。教練安歷基賽後就解釋尼馬踢後備，係因為呢位巴西球星之前踢國際賽冇休息過，所以今場畀佢唞吓。
識睇，一定係睇足英台【英波Live】：
http://soccer.appledaily.com
http://bit.ly/engballlive