有間香港上市公司，大股東兼創始人已經失去人身自由，內地傳媒話，可能與官場反貪腐有關。到今日內地傳媒再踢爆，該公司過去10年，接近一半利潤來自政府補貼，似有官商勾結嫌疑，正常情況下，股價實跌到阿媽都唔認得。但香港股壇已經被北水解放咗，所有邏輯常理都要推翻，公司股價昨日仲飆升30%！
呢間公司就係雨潤食品（1068），公司前日承認老闆祝義財被官方監視居住，但呢單負面消息反而刺激股價爆上。祝義財喺A股仲有間上市公司叫南京中央商場，昨日股價跌3%，證明單新聞對公司不利。但莊家要掃港股，老細失蹤，只是小事一宗。
之前漢能（566）一役，已經預演咗北水威力。雨潤昨日無厘頭勁升，證明表叔掃貨真係不問價、不看基本因素、甚至不用理會負面消息！
黃尹華