港股近兩日簡直上咗神州太空船，有人話升勢係由國家隊帶動，因為阿爺啱啱放寬社保基金投資範圍，又容許內地基金唔使以QDII額度嚟買港股。但係其實營運基金嘅人都知，即使阿爺畀佢即刻湧落嚟都好，佢哋動作都冇咁快。無論點都好，錢係衝緊入市，理得佢邊度嚟。
內地將會喺下個禮拜公佈3月及首季經濟數據，有投行估計GDP增長將會放緩至7%，舊年第四季係7.3%，出口數字更有可能大幅回落。有留意阿爺調控經濟嘅，都知道阿爺鍾意喺數據出嚟之前做嘢，而國務院總理李克強早兩日主持國務院常務會議，決定下調燃煤發電上網電價同工商業用電價，每度分別減2分及1.8分，另再降低鐵礦石資源徵稅比例。
克強指數中三大元素，耗電量、鐵路貨運量及銀行貸款發放量，2月份鐵路貨運貨跌9.1%，社會用電量降6.3%，新增貸款1.02萬億元。而阿爺喺耗電量落藥，加埋降鐵礦石資源稅又間接刺激鐵路貨運，似乎今年經濟下行壓力都幾大，相信今次經濟數據將會係市場焦點，尤其是港股急升、滬指上試4000點嘅時候。話說回來，股市幾時會有調整？
流氓