加入政府37年嘅前發展局常任秘書長韋志成日前開始退休前休假，佢同傳媒茶敍時慨嘆，工務工程面對緊咁多年來最嚴峻嘅環境，次次超支去攞錢都遇好大阻力，佢話每個項目都有應急費，唔可能啱啱好，過去10年嘅2,000個項目平均工程費實質少過預算費成15%，話如果項目應急費可以撈亂用，可能少好多超支。
但韋志成表明退休後唔會做「影子秘書長」對政策說三道四，因為年屆退休之齡嘅佢囡細老婆「嫩」，太太細佢廿年，囡囡更只得14歲，所以會畀多啲時間囡囡，仲打算學鋼琴同賽車，最想彈首經典英文歌《love story》冧太太，佢又分享自己十多年來用蘆薈護膚，所以個樣好後生，講笑當年係咁呃到太太番嚟。