利物浦隊長謝拉特離夢幻告別戰只差一步！全靠菲臘比古天奴一箭定江山，加埋米洛列特兩球神救，紅軍先至可以喺周三英足盃八強重賽，作客贏英冠嘅布力般流浪1:0。只要紅軍喺四強淘汰埋阿士東維拉，謝拉特就可以喺5月30號、即係佢嘅35歲牛一當日，以英足盃決賽作為佢紅軍生涯嘅告別戰。
1:0剪「布」 四強遇維拉
因為早前對曼聯被罰紅牌，謝拉特停賽三場，呢場同史卡迪爾、安利簡恩齊齊坐波監。雖然隊長唔落得場，但班隊友都好生性，其中門將米洛列特表現神勇，頂住布力般喺下半場初段嘅猛攻。70分鐘，佐敦軒達臣同古天奴喺右路撞牆，古天奴禁區內窄位一射，幫紅軍先開紀錄。完場前，布力般狂攻，門將西蒙伊斯活特喺角球攻勢殺埋上前場幫手，仲起到腳㖭，但米洛列特冇瞌眼瞓接實，幫利物浦頂住1:0勝局，打入英足盃四強，呢個月19號會喺溫布萊球場同維拉爭入決賽。
謝拉特賽後喺instagram放咗張同古天奴嘅合照，同埋留咗五個「錫錫」嘅表情公仔，相信意思係錫晒古天奴咁話。因為有古天奴呢球，謝四先有希望喺溫布萊踢夢幻告別賽。英足盃決賽喺英超收「咧」後嘅周日舉行，會係賽季最後一場比賽，咁啱呢日就係謝四生日。如果利物浦入到決賽，謝拉特仲可以幫紅軍贏到冠軍的話，真係可以畫上完美句號。
領隊羅渣士賽後除咗讚古天奴外，仲特別提到助攻嘅軒達臣。原來軒仔女友禮拜二晚幫佢生咗個女，但軒仔事業為重，喺周三瞓到冇瞓就歸隊。不過，法國中堅馬馬度沙高因傷退下火線，羅帥感到擔心，「佢覺得腿筋有啲緊，要再跟進一下，而史杜列治都係，所以都提早換走佢。」另外，前鋒巴洛迪利被傳媒指佢詐病，呢位意大利前鋒就喺instagram上載張探熱針相，證明自己發緊燒。
識睇，一定係睇足英台【英波Live】：
http://soccer.appledaily.com
http://bit.ly/engballlive