民建聯馬恩國南征北討，四處推銷佢條《反港獨法》，唔單止有報道講到繪影繪聲，話特區政府搞掂政改之後就會立法，連港區人大兼行政會議成員鄭耀棠都撐，一時間好似勢在必行咁，但梁特一句冇計劃立法就即時將事件K.O.。花生友聽聞，成件事似乎有左佬為咗找數多啲囉。
建制中人：嘥氣啦
花生友八過建制中人點睇，獲回覆「嘥氣啦」，佢話至少佢冇聽過金鐘嗰邊諗過搞；咁會唔會係西環想呢？佢就再講得白啲話，由始至終，立呢條法都只係一小撮極左嘅人嘅諗法，政府梗係由得佢哋大鑼大鼓落力推銷，事關喺今時今日嘅社會氣氛下，自然會有人、應該係唔少人都反對，咁咪可以了結件事。換言之，立法呢件事，連西環嘅意思都唔係喎。
呢位建制中人又提醒花生友，年底就係區議會選舉、明年就有立法會選舉，後年仲有特首選舉接住嚟。要搞咁嘅法例、都唔係呢個時候搞㗎，而特區政府更加要搞掂咗個政改先，搞得嚟仲邊有時間搞條咁具爭議嘅法例呢？
觀乎梁振英同律政司司長袁國強相繼否認有立法計劃，睇嚟成件事真係部份左佬一廂情願，可能受得恩惠多，都係找吓數。話時話，有口痕友話喎，若果有傳媒言之鑿鑿話政府會立法，而其實政府冇計劃，梁特按慣例應該一朝早就出聲明澄清不實報道，若然佢冇咁做，唔通有莫大苦衷？
花生友