本月中將第15次出戰世錦賽嘅香港桌球一哥傅家俊（Marco、圖），除有太太Shirley同囡囡包包陪行外，仲揀咗首新嘅出場音樂，就係愛爾蘭樂隊The Script嘅《Superheroes（超級英雄）》，佢話首歌旋律好，歌詞又有鼓勵性，好似其中一句：「超級英雄都要日練夜練先識得飛」，就道出Marco17年職業生涯不斷努力，先有今日嘅成績。
世界排名11嘅Marco，噚日難得喺香港幫香港失明人協進會「一桿過百慈善行動」做宣傳，周六飛返英國備戰18號開波嘅世錦賽，曾喺2006年殺入四強嘅佢話：「希望今屆以輕鬆心情應戰，唔想set目標，畀壓力自己。」Marco今季已打出33次一桿過百，暫為協進會籌得約九萬幾港元，佢希望喺世錦賽籌得更多錢幫弱勢社群。