港台長壽節目《城市論壇》嚟緊呢個星期日將會慶祝35歲生日，主持謝志峰向八方透露，當日朝早10點半至11點半，邀請過百城壇粉絲提早到維園「開壇」慶祝，仲請來「高登女神」碧樺依客席主持，嘉賓包括立法會主席曾鈺成、公民黨余若薇同禁毒專員許林燕明等。
謝志峰透露，本來想請運房局局長張炳良，但對方至今未知當日係咪離港公幹，所以一直未答實；而佢四出打聽過後發現，不論梁振英、政改三人組、蘇錦樑或行會召集人林煥光等都話唔得閒喎。但查實佢最想請嘅嘉賓，卻係前政制及內地事務局局長林瑞麟，大讚又有「人肉錄音機」之稱嘅林D9做局長時好肯上城壇講解政改立場，「佢（林）話呢啲問題不能假手於人，我好欣賞佢」。
原來峰哥冇林D9嘅聯絡方法，想藉八方地盤呼籲林D9見字可致電2339 7600同佢「相認」。八方聽聞，林D9卸任後不時出席基督教活動，近日亦現身支持由非牟利團體「愛德基金會」主辦嘅「活水‧行」活動，唔知謝志峰公開尋人，會唔會打動林D9嘅芳心？