嘩嘩嘩，熱錢打到嚟！二千五百億舞動，港股復活節長假後復巿追升960點，收報26236。如此價量齊升式突破，後市勢搗27000關。睇月線圖，恒指沿上升軌推進，一浪高於一浪，上行已無大阻力位，中長線可望挑戰2007年10月30日的歷史高位31958。港股升幅雖大，但估值仍處合理水平，短炒則需留意回吐風險。
港股通首見爆額，現時炒作最火熱係AH差價和PE大折讓的股份。恒生AH股溢價指數升至136.52的三年半高位，意味H股比A股折讓三成幾；而A股現價係今年預測PE 12.7倍，港股只係7.1倍，上升潛力更大。
放幾日假，我就病足幾日。開講有話：唔嫖又唔賭，畀晒藥材舖，真係冇講錯。我自問冇不良嗜好，但一年到晚，總有頭暈身㷫，食吓成藥，睇吓醫生，買吓保健品，都使唔少錢。呢幾日，我一路食藥，一路思量總理李克強在政府工作報告中指健康係群眾基本需求，要打造健康中國乜乜乜；又一路思量醫藥板塊，此板塊雖然開始郁，但仍跑輸大市，可追落後。
睇券商報告時，見中金推介A股受捧主題在港股的影子股，以及一帶一路和國企改革主題受惠股，當中有騰訊（700）、中鐵（390）、國藥（1099）等。嗯，中國醫藥集團旗下的國藥，亦係我心水股之一。事實上，騰訊主席馬化騰近日亦合夥入股前身為太太口服液的藥廠健康元（滬：600380），成第二大股東。
瑞銀花旗看好國藥
國藥主要業務係對醫院和分銷商分銷藥物及藥品、經營醫藥連鎖店及分銷實驗室用品等。舊年獲批成為混合所有制改革的首批試點單位，總裁李智明指目前正在研究細節，希望本月底向國資委提交第二稿方案。國藥舊年多賺27.8%，派末期息每股人民幣31分，瑞銀、花旗都睇好。國藥昨破頂，收報34.6元，升9.8%。睇走勢圖，國藥呈現區域上軌突破兼三重底突破向上利好訊號。策略上，現價可買入，首個目標價38元，止蝕價31.5元。
控股股東同為中國醫藥集團的中國中藥（570），亦可考慮。中國中藥主要研發及產銷中藥和醫藥產品，早前配股集資收購江陰天江藥業，瑞信、大摩都睇好。李克強話要積極發展中醫藥，中國中藥應該大把世界。該股連日破頂，四支陽燭，昨收報6.4元，升9%。走勢上，月線圖已呈杯柄突破。策略上，以月線圖保力加通道頂5.82元作參考，可於此水平買入，目標價7.42元，止蝕價5元。
割柑人
本欄逢周四刊登