八方細個讀書時讀過：「岳飛，字鵬舉，相州湯陰人也。生時，有大禽若鵠，飛鳴室上，因以為名。」2015年嘅今日，怕且要有新版：「馬恩國，字爆粗大狀，澳洲袋鼠國人也。成名時，粗口橫飛，聲震會議室上，因以為名」。
"You are not even a fxxking Chinese"，相信大家對馬恩國呢句金句記憶猶新；唔知係咪怕港人善忘，馬大狀噚日出席電台節目講起《反港獨法》立法時，竟然自比岳飛一樣愛國，唔介意畀人話係擦鞋仔。
唔少網民聽到馬恩國呢個比喻，即刻用番佢金句但用中文回敬佢：「你甚至不是個鳥樣中國人。」點解網民不齒佢變身岳飛？無非因為生為宋人嘅岳飛，肯定唔會拎外國護照，但馬恩國卻係澳洲籍港人，如果愛國，掉咗本澳洲passport先講。
有網民就質疑，馬恩國想要嘅精忠報國，係報袋鼠國抑或五星紅旗國？如果要刺青喺背脊，會唔會係刺英文拼音呢？事關佢連喺立法會爆粗，都係用雞腸；連中文粗口都唔識，仲係香港人？
中史老師：佢似秦檜
有30年教中史經驗嘅陳漢森老師就喺《壹錘定音》節目話馬恩國嘅比喻「不倫不類」，因為岳飛當年北伐目標是反外敵侵入，恢復失去嘅國土，唔係要「國家統一」，其次岳飛「肯定唔係擦鞋仔，而係處處同皇帝作風相反」。陳老師話馬恩國根本唔識岳飛嘅事迹，覺得佢仲似秦檜：「幫當時嘅皇帝陷害忠良，陷害一啲真正愛國家嘅人。」
咁使唔使以莫須有處死？八方純粹輯錄網民意見，旨在畀大家輕鬆笑一笑，相信讀番書嘅馬大狀，唔會咁小器介意。佢噚日仲同八方講，又要飛去袋鼠國咯！
李八方
mailto:[email protected]