中證監開閘，准許內地基金冇QDII都可用港股通，掀起今季港股狂追落後的序幕。昨日芬佬友人仍在歐洲放假未返，天未光已被電話吵醒起身追貨，仲要all in嗰隻。他說，PE超過100倍的內地創業板近日顯著回落，是一個重要訊號，反映北水轉落嚟炒「相對」較便宜的港股。呢鋪是來真的。
身處港股大時代，應點揀股？Sorry，係唔使揀的。如上周碧桂園（2007）做了一個相當dilutive的配股，翌日股價照升無誤。金山軟件（3888）明明今年盈利很可能no growth，但仍爆升24%。仲有波司登（3998）早前才發盈警，國美（493）更是no news，但兩者皆可單日喪升三成。
事實證明，北水喜好無基本因素可遁，只要該股票是：一、名字為內地人熟悉；二、（表面上）落後於A股其他同行，即可落鑊。Fundamental？Who cares？睇top-down、炒消息好過。有芬佬直言，現時每日只需望實港股通十大成交及CCASS持倉，「合埋眼」跟已搞掂。問題只係：今次升勢可以維持幾耐？
經過一輪追貨，昨日條街已講緊上望30000至32000點。但好友提醒，由於今時今日港股與A股關連性大增，故港股每個上落周期是可以縮到非常短，即chok到冇朋友。還記得上次升至30000點後的結局？阿寶金句又係時候出場：人類總要重複同樣的錯誤。
海迪