早排寫過國泰航空（293）前公關一姐莊偉茵（Quince）過檔中電（002）做企業發展總裁之後，舊年年薪880萬元，較佢離開國泰前大幅增加八成之多，呢單消息已經令到唔少人嘩嘩聲。咁都唔止，根據國泰最新年報資料，原來Quince仲高薪過國泰行政總裁（CEO）朱國樑㖭呀，唔知有冇羨慕死隔籬呢？
國泰噚日公佈最新年報，舊年3月升任CEO嘅朱國樑，舊年總年薪737萬元，加薪兩成，當中基本薪金與花紅分別增加12%與37%，不過仍然低過Quince喺中電嘅年薪，難怪Quince喺2012年決定過檔中電幫嘉道理打工喇。
喺國泰董事局入面，朱國樑都唔係最高薪，財務董事馬天偉舊年總年薪911萬元，人工最高，管數嘅人的確好重要。