鄭希怡（Yumiko）噚日朝喺港安醫院為化妝師老公梁學儲生BB女，據知佢今次係擇日開刀。Yumiko噚晚大約7點半左右，喺facebook上貼上BB下半身包住尿片嘅相，喺張相嘅角落頭清楚見到印有港安字樣嘅毛毯放喺床上。喺佢發相短短十幾分鐘後已經有60幾個「like」。
不過佢為咗保持神秘感，暫時未公開B女個樣，相信多少都由於媽咪Yumiko貪靚，要等兩母女變番靚啲先可以現身。
至於Yumiko噚日講番囡囡出世時話：「BB今朝出世，5.5磅，成個過程好順利，亦都好感動，學習點做媽咪。」而Yumiko就笑住話B女叫做「梁浸浸」，因為噚日涼涼哋。
物色臍帶血血庫
另外，前日Yumiko喺fb表示已經為BB女物色到一間可以儲存臍帶血嘅血庫，為BB嘅將來以防萬一，最特別嘅地方係嗰間血庫嘅資料係由未有亦不打算生小朋友嘅伍詠薇提供。
撰文：馮仁昭
