港股牛氣沖天，就連一向冇乜人吼嘅港股通都首次用爆額，作為滬港通主要推手嘅港交所（388）行政總裁李小加都應該飲得杯落。仲放緊假嘅小加，雖然噚日冇同主席周松崗一齊見記者，但佢喺新聞稿度都講咗幾句攞番個彩。
小加嘅歡喜冤家──立法會金融服務界議員張華峰又點會俾小加獨領風騷，佢今日就會好威威咁，帶埋九大經紀商會、基金公會同埋記者等超過50人到訪深圳，與深圳金融辦、深交所同前海當局會面。
張華峰早前已經話，今次係少見嘅大型代表團，希望到時可以跟深交所了解深港通安排，同埋向前海方面提出訴求，畀本地券商喺當地設辦事處，同埋向內地投資者宣傳推廣港股。