因緣際會，認識咗造紙T，T君來自南洋，服務於一個東南亞大財團，負責亞洲區紙業銷售，剛自日本分公司調來香港。見到紙專家，自然問佢幾句造紙與環保嘅問題，點解呀？每年香港都有環保團體趁節日出來宣傳用紙太多，有害地球，例如在新年就話香港人用利是封太多，相當於斬死Y棵樹，到中秋節就話香港人用月餅盒太多，相等於斬死X棵樹，大學搞迎新營，就話大學紙印材料太多，相當於斬死N棵樹，總之用紙就係唔好，用紙就是傷害森林樹木。
T君如此回應：環保團體不是不知，只係選擇性不知，以便達到宣傳目的。佢個集團在東南亞與中國擁有幾十萬公頃林地，每年小心種植樹木，以軟性木為主，每隔五至七年就斬樹用來做紙漿造紙，空出嘅土地再種新苗，如此循環不息，基本上係「再生種植」（renewable plantation），樹木總數維持不變，絕非斬咗一棵就冇一棵。美國加拿大用來建屋，做傢俬嘅樹木要年齡長、質地硬嘅靚木，根本唔適合用嚟造紙，環保團體斷無不知之理。T君又指一啲再循環用紙（recycled paper），環保團體猛咁推廣，實質呢類紙常會有化學劑，對皮膚有害，紙巾千祈唔好用呢類再循環紙製造。
左丁山又問佢新聞紙係報紙最大成本，目前國際價格如何？T君話佢間公司唔製造新聞紙，但根據RSI Asia Pulp and Paper Monitor（行業雜誌）嘅資料，45G新聞紙價由2014年第三季嘅每公噸560-585美元下降至第四季嘅520-550美元，2015年預料新聞紙價備受壓力，逼使紙廠降低產量，到2016年供求開始平衡番，新聞紙價又會開始上漲。左丁山在20年前到過印度開會，學咗一條大拇指法則（rule of thumb），就係每公斤新聞紙可切成36-40張大紙（broad sheet），如要計算每一版嘅紙價，十分容易，以每噸520美元計，就係520乘7.8除1000除36，得出每張紙成本係港紙0.1126，如果報紙銷量有20萬份，那麼每增加一張紙內容（即四版），紙成本就係每年822萬元，增加半張紙（兩版）成本係411萬元，再加上油墨（約10%），故此唔好睇小一版變兩版嘅成本，小數怕長計，副刊由一版紙擴闊至兩版（即半張），一年增加嘅新聞紙同油墨成本可能高達226萬元，大削稿費都無補於事！