警務處處長曾偉雄就嚟退休，雖然佢某啲事件嘅處理手法好具爭議，但都有人欣賞佢咁硬淨，或者有人戥佢成日被插不值啦，《立場新聞》報道，佢哋發現一哥喺維基網站嘅條目，去年起至少被兩名「警粉」不斷修改，喺佔領運動期間同之後特別活躍，主要加入唔少讚揚一哥功績嘅內容，例如話佢「任內多有建樹，對警務處進行了多方面的改革」，至於原本有維基用戶批評一哥對涉嫌知法犯法嘅警員執法標準有偏差，對CY家暴事件又唔處理嘅內容，就被「警粉」刪走。
《立場》話兩名涉嫌隱惡揚善嘅「警粉」，分別為登記用戶「Yhinz17」、以及未用登記使用IP地址110.22.123.12嘅用戶。前者係維基活躍用戶，多次增、刪維基網站嘅內容，後者嘅IP地址來自澳洲，身份未明喎。