利豐（494）大股東馮國經有三位子女，市場最熟悉，應該係做緊利豐行政總裁嘅二公子馮裕鈞（Spencer），細仔馮裕津（Stephen）相對低調，佢新近就處男下海，替孫大倫旗下中港照相（1123）擔任非執董，首次做上市公司董事。
Stephen已經39歲，喺波士頓學院修讀文學學士，之後喺日本國際大學取得工商管理碩士學位。佢2008年返家族企業馮氏集團工作，翌年做玩具反斗城（亞洲）掌櫃，2011年開始升做利童行政總裁。
利童暫時未上市，目前喺香港、新加坡、馬來西亞同汶萊經營美國童鞋品牌Stride Rite，又喺中港澳經營Toonsland童裝連鎖店。馮氏過去多年陸續分拆旗下業務上市，利童上市可能係遲早嘅事，Stephen𠵱家做住人哋公司非執董，話唔定將來就有間上市公司話事喇。