八方相信近期啲花生銷情應唔錯，因為好多人都等緊熱血公民黃洋達同忠義民團嘅Man哥上擂台打MMA決戰。點知花生都未剝，決鬥就有可能泡湯。事關Man哥突然要求轉打泰拳，網民質疑佢想縮沙喎。
皇上日前先「報喜」，話「力保健搏擊之夜」嘅主辦單位想承辦呢場MMA，點知皇上引述阿Man「反口」，話對方無視早前雙方同意以MMA規則作賽嘅條款、單方面建議改打泰拳，原因係覺得MMA在港普及同認受性不及泰拳喎，仲話知道皇上識得泰拳，又喺4號作賽過，但自己未學過喎，暗示皇上更着數。
皇上：咪咁肉酸
皇上聽到呢度火都嚟，澄清4號嗰場係拳擊唔係泰拳比賽，仲喺facebook貼意向書反擊，「你轉頭又話太極普及啲，咁我哋約出嚟推手呀？咁大個人咪咁肉酸啦，唔好成世人都坐喺天台邊得把口咁，試吓勇敢啲，邁步向前啦」。Man哥唔忿氣，喺fb反駁「（意向書）即係仲要傾多幾次先叫落實」，唔少網民就笑Man哥無賴疑似想縮沙。呢場花生騷，似乎改咗喺fb上演喎。