A股火箭式上升，情況有啲似2007年，當年滬綜指亦係3月由3000點附近起步，一路向上沖，最高10月上到6124點。滬綜指成分股包括所有上交所股票，由於目前股份數目已比當年多咗三分之一，而家指數只係4000點附近，但所對應的資金規模，已遠遠超過2007年最癲嗰時。
內地傳媒統計，2007年已上市股票中，而家已經有七成股份股價，超過6124點時水平。當年最高日成交為4,100億元（人民幣．下同），現時一早已衝破1.5萬億元。至於每周股票開戶人數，上周亦打破2007年紀錄。而家A股整體市盈率（PE）為25倍，雖然冇2007年70倍咁誇張。但散戶呢兩年集中炒中小股，創業板股；A股現時有四成股票PE超100倍，半數的股票超過80倍，癲況同當年冇差幾多。
黃尹華