Sorry，又係日本。冇辦法，東京一場5年來首次嘅4月雪，令fb被洗版，因為白雪正正落喺櫻花樹上，就係日本人講嘅「雪櫻」（圖）。無論係白雪降落喺粉紅櫻花，或者櫻花落喺雪地，日本人覺得見到都係一種「小確幸」。
#5年首次4月落雪
日本《產經新聞》報道，受到強烈冷氣團影響，東京噚日凌晨時分氣溫已經降到7℃左右，早上8點更加一路落到2.8℃，之後慢慢飄雪。山梨縣、長野縣、新潟縣都有多處落雪。東京都心地區係5年來首次4月落雪，上次係2010年4月17日。
東瀛遊執行董事禤國全話，櫻花係要天氣和暖先盛放，多數喺4月，好少會突然轉凍到落雪，所以雪櫻喺東京並唔係常見。唔怪得喺日本twitter都係畀雪櫻洗版啦，每張相都係絕美。不過，有啲喺東京玩緊嘅朋友話睇唔到雪櫻，梗係啦，場雪喺清晨落，幾條友梗係未起身啦。
日本氣象廳預測，東京仲會凍好幾日㗎，係咪好想買張機票飛去睇呢？不過，唔好以為過咗復活節假機票價會回落喎，因為禤國全話，𠵱家日本幾乎全年咁爆，已經冇淡季喇。
費清 ＃要生計，也要生活 ＃毋忘初衷