前年喺日本播出嘅NHK台晨早劇《海女》，捧紅咗好多新星，包括女主角能年玲奈、變咗廣告女王嘅有村架純、《今天不上班》嘅福士蒼汰。最奇嘅係連做大配角、同能年一齊扮演組合GMT成員嘅松岡茉優，最近突然上位，電影、劇集、電台節目都有佢份。
20歲嘅松岡茉優，12歲加入藝能界，但都係做大茄，去到《海女》算係比較多戲份，佢喺劇中做GMT隊長，頗有個性，演技受好評，但等咗年半先至越嚟越多工作，嚟緊下周首播嘅富士台新劇《She》，就由茉優擔正做女主角。另外，前日茉優同埋男星岡田將生宣傳合演新片《Strayers Chronicle》，佢亦都企正中間。有日本傳媒估計，雖然比有村、福士遲起步，但相信茉優今年必爆。
撰文：壇墨