大市升到癲，大家第一時間諗：追唔追？最理性分析，成交昨日創歷史紀錄，但昨日只係啱啱破26000點，要突破2008年5月高位易如反掌，技術上只要阻力位一破，理論上有力上衝。
第二係，港股通首次用爆額，證明北水真係湧港買港股。大家見識過內地散戶炒股，好似漢能（566）咁，唔炒到去超越常理都唔收手。恒指歷史市盈率15倍左右，昨日恒指市盈率只係11倍，照計資金冇理由咁快收市唔玩。
今日個個板塊放煙花，其中科技股好多都升幾成。上內地雪球網睇今日星期最多散戶新增關注嘅港股，十隻入面有五隻係科網股，排第二位嘅係飛魚科技（1022）。
呢隻股上市只有4個幾月貨仔，之前一直唔點行。但你唔識佢唔代表內地人唔識佢，至去年底其遊戲組合包括5款手機遊戲，以及2款網絡遊戲，包括《神仙道》RPG系列及網上爆紅嘅手機game《保衛蘿蔔》。《保衛蘿蔔3》將由騰訊（700）遊戲獨家代理髮行，合作為期3年。飛魚噚日一棍大陽燭升超過五成，係就係升爆廠，但理論上經調整後，有力再上，可列入觀察名單。另外，可留意神州數字（8255），首先食到「互聯網+」概念，如顯著突破上年5月2.4元高位，可以追貨。
Fifi
http://www.facebook.com/lovefrystock
本欄逢周二、四刊出