雖然成日話樓市風高浪急，仍不乏有膽識嘅買家入市。呢排豪宅市道好熱鬧，新地（016）上個月就拿拿聲推咗赤柱村道50號獨立屋出嚟賣，復活節假期已率先賣出一幢，噚日新地安排3號屋出售，聽聞已故慈善家兼寶聲集團陳樹渠家族成員，以1.69億元買入。
聽聞，唔止一個買家對3號屋有興趣，前後有兩個買家想買，結果兩個買家噚日喺售樓處玩抽籤，中咗就有得買，陳樹渠家族成員就中咗獎嘞。
呢間屋3,179平方呎，有個1,671平方呎大花園，呎價要成5.3萬元。
話時話，陳樹渠家族近年都經常出手入貨，舊年政府產業署拍賣豪宅，第三代繼承人陳耀璋就一擲3,100萬元買入薄扶林碧林大廈放名畫。