周三另一場德盃八強戰，由丙組一哥比勒費爾德越級挑戰甲組三哥慕遜加柏。論人腳及實力，當然以慕遜加柏佔優，但由於今役有主場之利的比軍於主場表現特醒，料起碼可以頂得住半場，不妨吼兩隊開[半和]。（球賽編號：星期三17；無綫網絡電視01台明日1:00am直播）
慕遜加柏半場例和波
慕遜加柏目前在德甲排第三，實力好之餘，一眾主力如中場麥斯古斯及靴爾文等都腳風頗順，今役就算作客，要擊敗丙組的比勒費爾德料不成問題。不過，要留意的是慕遜加柏踢法一向穩陣，作客或踢盃賽時就更加以穩字行先，因此，近10場作客正式比賽就有六場開出[半和]，而近三場盃賽全部開[半和]，因此，今役亦可以再敲他們半場打和。
至於前甲組球隊比勒費爾德現已淪落至丙組，幸好球隊今屆表現不俗，目前在丙組領導群雄，他們於主場表現更特別醒神，近九場主場全勝，今役更料有主力之一的中場梅拿復任正選，配合把握力不俗的中場馬斯特及前鋒尹達比辛等，其實有力與慕遜加柏一鬥。
畢竟，比勒費爾德在上兩圈分別淘汰了哈化柏林及雲達不來梅這兩支甲組隊，證明他們遇強越強，今役就算頂不住全場，亦起碼能頂住半場。
文：吾中
識睇，一定係睇足英台【英波Live】：
http://soccer.appledaily.com
http://bit.ly/engballlive