下周英超爆發曼市打吡前，曼城先受沉重打擊，周一作客排喺中游嘅水晶宮，竟以1:2落敗，亦喺今輪過後，正式被阿仙奴同曼聯超越，由第二跌落第四。雖然前四位置仍然穩陣，但由本來係想追「車」衞冕，到𠵱家隨時只得第四，下季分分鐘要打附加賽先可以入到歐聯分組賽，認真丟架，難怪賽後已經有好多輿論話領隊比歷連尼一定保唔住飯碗。
贏形勢不敵水晶宮
雖然輸波，但我求大俠戥曼城有啲唔抵，因為佢哋成場波發揮唔差，上半場如果唔係阿古路中柱，開紀錄嘅應該係佢哋，但世事往往就係你入唔到，人哋就攞你命。水晶宮34分鐘憑一次有越位嫌疑嘅攻勢，由格連梅利射入領先半場；換邊後僅三分鐘，賓捷安又入勁靚嘅罰球，當堂令藍月亮士氣沉晒，結果全場控球率達74%兼射門22次，都只能夠靠耶耶托尼追番一球，注定全失三分。
比歷連尼賽後受訪，亦解釋唔到點解踢得好都輸，我求大俠覺得藍月亮頭上有片烏雲，呢一個月氣勢急轉直下，歐聯對巴塞出局都算，聯賽不斷失分先奇，阿古路仲連續六場交白卷。曼城同榜首嘅車路士爭九分，而且喺積分榜亦正式被阿仙奴同曼聯超越，本來諗住衞冕唔成，都至少攞番個第二，順利直入歐聯分組賽，𠵱家由阿二跌落第四，來季可能要踢附加賽，先至決定可唔可以入到歐聯分組賽，真係咩面都冇晒。好在仲領先第五嘅利物浦七分，尚算穩陣。
耶耶hea踢有離心？
近期都不斷有人猜測，如果曼城連第二都冇埋，比歷連尼下季一定冇得撈，傳話班主想搵哥迪奧拿或安察洛堤其中一位嚟接手。
呢位智利工程師就話冇得擔心咁多，只係希望繼續喺度教。我求大俠幾同情比歷連尼，或者大家已經忘記佢上季一嚟到，即刻幫曼城捧走英超同英聯盃，但世界就係咁殘酷，尤其曼城呢啲由老細話事嘅球會，一季冇成績，就可以贈你大信封。
至於耶耶托尼雖然入波，亦都被批評話係賓捷安射嗰個罰球，作為人牆嘅耶耶竟然縮頭，仲話佢踢到冇咁落力，可能因為近期受國際米蘭斟介而有離心，我求大俠就覺得呢番批評睇完笑吓就算喇。
識睇，一定係睇足英台【英波Live】：
http://soccer.appledaily.com
http://bit.ly/engballlive