喺香港食牛肉麵，總係覺得唔夠台灣味。4位家庭主婦向寶島牛肉麵師傅學藝，再加入自己嘅創作，噚日喺荷里活廣場爭奪「港版廚娘」美譽。結果有「石美人」外號嘅石麗萍脫穎而出，佢大賣關子唔肯透露秘方，其實煮嘢食最緊要有愛心，好似佢咁，一路煮一路掛住一對仔女，咁就自然煮得好啦！
至於61歲嘅Molly就以自家種植有機番茄熬湯底，又用有機蘿蔔同甘筍做出酸酸甜甜嘅開胃前菜，主打健康有營，贏得「最具創意獎」。佢話囡囡自細患癲癇症，自己本來唔識煮嘢食，為咗囡囡「頂硬上」不斷研究健康食材。為咗可以自己種菜，更加由沙田搬入元朗。財爺提出要搞美食車，已經退咗休嘅Molly相當期待，打算到時帶埋囡囡一齊經營。