周二亞冠盃只要贏波就可以提早出線嘅FC廣州（恒大），作客1:2輸畀鹿島鹿角，要再等下一輪分組賽，先可以確定能否出線。
賽前喺亞冠盃H組三戰全勝嘅恒大，今場只要作客擊敗榜尾三戰全敗嘅鹿島鹿角，就夠分提早出線。不過，世事往往冇咁順攤，唔好以為鹿角蝕晒氣，佢哋決心仲強過恒大，仲喺19分鐘博到對方後衞金英權手球，由遠藤康操刀射入，替球隊領先半場。
高崎寬之絕殺冇仇報
恒大下半場出番嚟，多番啲控球，結果踢到74分鐘，由上半場罰球射中柱嘅艾傑臣，接應郜林妙傳，喺禁區內補到個靚位快腳射入，將比數扳平。本來以為場波會以1:1結束，但踢到補時三分鐘，後備上陣嘅高崎寬之接應罰球頂入，幫鹿角喺完場前絕殺，真係令恒大冇仇報輸1:2。不過，雖然恒大冇得提早出線，但都仍然領先第二位嘅FC首爾同第三位嘅西悉尼流浪者四分，榜首好穩，反而鹿角就真係要多謝恒大，全取三分後，喺餘下兩輪仲有得爭出線。
識睇，一定係睇足英台【英波Live】：
http://soccer.appledaily.com
http://bit.ly/engballlive