復活節假期放完咯，唔少打工仔又要收拾心情上班去，而特首梁振英則喺今日啟程到訪武漢同上海，出席「滬港合作會議」，周五先返香港。查實「內交」呢家嘢，一直都係CY嘅強項，相信佢喺餘下任期都會繼續循此路進發，或者會成為佢爭取連任「政績」㖭㗎。但有政界口痕友話，CY要連任，最大敵人係自己，否則做啲乜都係假。
呢位政界口痕友話喎，CY最大嘅問題，就係會將一件好事變成壞事。佢話隨手數到嘅例子，包括佢決定興建多啲公屋、幫助基層上樓，呢樣嘢本來以前都要做㗎嘞，只不過前特首煲呔唔敢又唔肯之嘛，之但係唔知點解一個咁好嘅政策，由CY治下嘅政府執行，硬係唔可以成功攞到好多分、至少民望唔見顯著反彈回升。
敵我分明令人反感
歸根究柢，呢位口痕友話，可能都係因為CY為人嘅問題，令佢做咗好人好事都唔獲欣賞。到底佢有乜問題？當然係敵我分明得好緊要，對異見者只有批鬥冇溝通，而佢嘅好勇鬥狠格，肯定有部份市民反感，試問又點會認真留意佢嘅政策？最新鮮滾熱辣嘅好鬥例子，莫過於佢日前突然出聲明，反駁前基本法草委李柱銘話起草《基本法》時有提過公民提名問題，查實如果佢唔堅持還拖，就唔會出聲明；若然唔出聲明、就唔會被發現搞錯事實，更唔會喺聲明發出後就急急修訂，刪咗冇包含公民提名呢句。
有花生友話呀，「佢好哋哋唔反駁，單新聞都冇人再理；但佢死心不息要反駁馬丁（李柱銘）嘛，反而令自己出醜，係人見到佢刪走啲字，直覺都覺得佢錯咗啦，呢啲係咪叫做『唔衰攞嚟衰』呢？」
花生友