香港桌球壇雙喜臨門，恭喜恭喜！講嘅係香港桌壇一哥傅家俊（Marco）同亞運獎牌隊友馮國威，不約而同喺今年七月齊做爸爸。Marco正期待佢同太太Shirley嘅第二位千金喺英國出世，等緊囝囝出世嘅阿威就選擇喺香港生，兩位「桌爸」更有機會喺今年六月齊齊去無錫出戰世界盃隊際賽，為港爭光！
包包得意唔諗追仔
2011年結婚嘅Marco，禮拜六就會飛返英國會合留英待產嘅太太及大女包包。雖然唔係第一次做爸爸，但諗起家庭又多一個成員，37歲嘅佢都既興奮又緊張，亦好期待：「其實生仔生女我都冇所謂，最緊要佢哋健康、聽話、孝順同開開心心，好似大女又乖又得意。會唔會追仔？我諗順其自然啦！」Marco上月底飛到泰國同北京出戰兩項世界排名賽，被迫暫別妻女，難怪佢話好期待返英國同屋企人見面。
至於Marco嚟緊嘅任務，就係今個賽季最後一戰、本月十八號喺英國設菲爾德舉行嘅世錦賽，佢話：「呢排太多比賽，令練習減少，自已近排打得麻麻。世錦賽係每個球手嘅夢想，每次我都好珍惜，希望今屆吸取以往經驗，做得更好。」四年前佢同馮國威拍住上出戰世界盃隊際賽，仲打入四強，Marco都話想再參加：「除咗亞運，世界盃係唯一有隊際賽打嘅比賽，我打嘅機會都好大。」
馮國威請教湊B心得
而同太太方麗盈喺2013年底結婚嘅馮國威，上月出席傑運頒獎禮獲頒「最佳運動組合」（夥拍隊友李俊威）時，腹部微隆嘅太太都有陪伴到場。七月第一次榮升父親嘅阿威話：「可能BB仲有一段時間先出世，我𠵱家未太緊張住，遲啲或者會請教Marco同國明（大師兄陳國明）湊B心得。不過，自己都想繼2011年後再同Marco一齊參加世界盃隊際賽。」月底原本到大馬出戰亞錦賽嘅阿威，由於失落遴選賽，所以好想去打六月舉行嘅世界盃。
