第七場1600米二級賽主席錦標係今期戲肉，摩廐黑衣巨人「步步友」挾準馬王威勢而來，結果熱到1.1倍開跑，拉士雖然雷神要騎，但「步步友」都能夠以個多身位之先順利蟬聯桂冠，級際賽五連勝兼完成在港十捷偉業，總獎金突破4,600萬元，成就直逼廐侶上屆馬王「威爾頓」。
「步步友」前仗1600米董事盃及上仗縮程贏1400米女皇銀禧紀念盃，都只是行過對手，今次返番首本路程1600米，直路雖然都係睇住對手嚟過，但明顯冇之前咁輕鬆，雷神見對手亦衝得好行，於是自己有打鞭，以維持領先優勢過終點，形成贏馬姿態較辛苦，雖然壓倒第二名「美麗之星」一又四分一身位，但已是牠今季贏馬距離最短一仗，而「美麗之星」季內六次做二奶，第三次與「步步友」串Q。
至於「駿馬名駒」郭能人馬盡晒力都入唔到Q，影相跑第三，第四名係「花月春風」。大摩身在澳洲復活節拍賣會買馬未返港，截至此場以43比42win，超越方嘉柏進佔榜首。
「步步友」馬主李福鋆醫生說：「『步步友』千六米性能特佳，賽前我有相當信心，牠沒有令我失望，下仗會跑冠軍一哩賽，跑完該場再想會否出外遠征。」