特技風箏，你見過未？八方日前有幸喺大埔大美督水壩，見到人稱強哥嘅劉振強大展身手。當時強哥氣定神閒企喺水壩上，迎着八仙嶺，兩手各掛一根線，牽動空中嘅風箏；只見佢兩手交替伸縮，風箏就時而騰空、時而俯衝，又會喺半空做出連串8字，唔少市民睇到嘩嘩聲。
退休多年嘅強哥，原來玩咗8年特技風箏，旨在打發時間，佢估計香港玩特技風箏嘅人只得兩、三位，可能受場地限制啩，因為特技風箏嘅衝擊力，有機會意外傷人，好難搵到適合地方。
而特技風箏同市民放嘅風箏有啲唔同，主要靠兩條線牽引，控制風箏急速左右轉向。強哥周六或日都有機會喺大美督水壩出沒，想睇佢獻技嘅市民不妨去碰吓運氣。