有朋友同情市建局行政總監譚小瑩（圖），指左丁山因為識得蘇慶和，有所偏幫。冇錯，左丁山係識咗蘇慶和好耐，佢在港大畢業，在中大攞MBA，佢嘅MBA同學之中有幾位係左丁山嘅朋友，兼且我地又不時在馬場碰到面。
不過咁，左丁山一貫反對一啲過份熱心人士以為自己頭上有光環，口中唸唸有詞講社會良心、社會責任、社會使命，噏完就猛咁運用公帑，以為係為民請命，實則只是用OPM（other people's money），叫佢用番自己錢，睇吓佢地肯唔肯？（例如大削自己人工，為人民服務）。市建局係公共機構，用納稅人嘅錢，幾年間工作人員人數急劇膨脹近一倍，估價部都話有幾十人，仲多過上市大地產公司，不知有乜嘢好理由嘞，左丁山就唔信市建局人多好辦事、工作效率好得過新鴻基地產。蘇慶和做市建局主席，只係一名大義工，付出嘅係時間與精力，如果佢唔要學張震遠咁為政治前途而為自己樹立形象，爭取歡迎指數，大可慳番啖氣，任由譚小瑩及行政人員開水喉嚟「達到社會使命」，做乜要做醜人，要求市建局追求efficiency and effectiveness、要求收緊成本，減少虧蝕啫？
蘇慶和發公開信俾市建局職員，指謹慎理財與社會使命可以並存，並非互相矛盾。佢講得係啱嘅，一個公共機構嘅行政總裁（或總監）斷不能因為掛住有使命而令機構財政陷入赤字，年復一年，不求改善希望政府最後注資打救。
政府注資市建局與否，係財政司司長每年寫預算案嘅考慮，司長要面對一連串嘅困難決定，枱上有一百億元，究竟用於興建醫院好吖，撥俾房委會好呀，還是俾社會福利？又要問大學教育科研是否要錢，是否推行十五年免費教育？抑還注資市建局去做中環街市保育，俾錢市建局用錢為舊樓業主維修？千祈唔好以為財政司司長有好多個一百億可以滿足所有社會需要。假如市建局能收支平衡甚或有盈餘，行有餘力去幫助舊樓業主（注意：是業主，不是拿綜援人士）就最好啦，唔使睇財政司司長面色。在市區用萬幾蚊一呎收舊樓，部分用來起公屋（嶺南大學一位副教授如是云）嘅話，市建局話咁快就會變成亞視。測量師彭兆基在now節目「時事全方位」講得好，政府若要有咁多社會使命，不如收番啲地交俾房委會去搞，要市建局嚟做乜噃。