喺NCAA決賽前夕，美國籃球名人堂周一公佈今年入堂嘅11人全部名單；除咗前塞爾特人教練海索恩（Tom Heinsohn）等五人喺NBA明星賽已經公佈外，新增六人名單之中最為香港球迷熟識就係「封阻王」莫湯保（Dikembe Mutombo）。莫大叔喺NBA生涯試過三奪封阻王同八度入選明星賽，又喺火箭做過隊長帶住姚明，到2009年先以42歲高齡宣佈退休。另一位前籃球名將就係WNBA代表人物莉絲妮（Lisa Leslie），佢幫美國女籃四奪奧運金牌，又為洛杉磯火花贏得兩屆WNBA總冠軍，仲係WNBA史上首位入樽球員；莉絲妮亦憑住六呎五吋嘅高䠷身材，喺場外客串做模特兒同拍電影。