英皇集團老闆楊受成噚日自爆，復活節長假拉埋周大福（1929）主席鄭家純去菲律賓度假，同行嘅仲有六福（590）主席黃偉常。嘩！呢個組合，最啱就係圍埋狂呻名貴珠寶手錶同埋黃金嘅銷情有幾慘喇。
最近城中其中一個熱門話題，肯定係自由行減少對本港零售業有幾大打擊，首當其衝就係珠寶、鐘錶業，唔知楊受成、純官同黃偉常喺菲律賓呻完，有冇度到好橋救市呢?
楊受成與純官向來老友，一齊去旅行唔出奇，事關本港富豪界有一個有番咁上下歷史嘅「鋤Dee會」，鋤Dee會以純官爸爸鄭裕彤為首，楊受成係核心成員之一。
至於黃偉常，佢一向同行家關係好好，據聞佢以前喺內地搵到靚舖位，都會預埋周大福，叫對方喺左右隔籬開舖，一齊帶旺人流。舊年底英皇珠寶喺尖沙嘴開新舖，黃偉常亦有到賀。