講到特種部隊，大家好多時只係諗起美國嘅海豹、三角洲、英國嘅特別空勤團等，勢估唔到中國原來已經有一支特種部隊，打入全球第11大最勁嘅特種部隊。
網絡最近瘋傳一篇名為全球11個最強特種部隊嘅文章，介紹列強嘅特種部隊。八方邊睇邊諗，點可能冇中國份？果然，強國係要壓軸出場，最尾嗰支就係中國嘅「城管」。
文章「分析」，城管實情係「上能打飛機、下能秒坦克」嘅秘密發展軍事化組織。平時管理城市，鍛煉游擊戰術，戰時則回歸部隊，顯示最強實力，仲聲稱引述五角大樓報告話，每位城管嘅水平都勁過海豹、偵查能力厲害過中情局。八方再細心一睇，發現原文其實只係選咗10大；至於第11大（圖），相信係「有心人」加上後瘋傳，而佢呢個「精選」，獲唔少網民畀like囉。