馬仔唔聽話，搞到全國政協常委唐英年噚日又失望而回。唐唐今年初重返馬圈，唯一愛駒「回眸一笑」噚日第4次出賽，喺沙田馬場跑第2場2,000米，唐唐拖住太太郭妤淺一齊到場為愛駒打氣，兩位心情好靚。
唐唐應該都好錫「回眸一笑」，佢星期日仲專登走入馬場探佢，可惜，「回眸一笑」似乎唔多聽話，噚日開跑後，沿途大墮後，騎師梁家俊直路狂鞭，佢都冇乜反應，結果跑第12，即係尾三。
「回眸一笑」今年2月至今，出賽4次，最叻只係第9名，表現認真麻麻地。話雖如此，根據《百年毗陵唐氏》一書，唐唐11歲就識睇馬，又養過超過10隻馬，佢揀得呢隻馬返來，應該唔會太差，可能未適應環境㗎啫，希望呢隻馬仔好快跑出，讓唐唐重返凱旋門威威喇。