潘頓頭四場非冠即亞入晒Q，之後輪到雷神個人表演，第五場先贏摩廐「飛來猛」，第六場四班千六米再贏沈廐「曦世之寶」包辦一口孖寶。
「曦世之寶」由千四米加程首戰千六米，4.2倍連捷，同場另外兩隻增程馬「歡樂一生」同「勇駒」分別後上跑二、三名，呢條加程三重彩派976元，第四名係新勝千六米之「光速銀桂」，四重彩派七千二百幾。三T因三關賽果都偏向正路，故正獎僅派二萬七千幾，係近期最奀一次。
講開「曦世之寶」，由雷神接手後連勝兩場，人馬合作未輸過，而雷神季內騎咗沈廐馬30次，取得5冠2亞6季，上名率超過四成唔錯。今場「曦世之寶」馬主李澄曜一如之前同靚靚太太凱倫一齊拍拖入場，凱倫見「曦世之寶」殺上突圍時，興奮到彈起，笑到唔停口；同主「凱倫之寶」4日12日將上陣，呢位曦世靚太隨時又有得拉頭馬。