上星期發生咗兩件事：第一件係亞視不獲續牌，變相等執笠；筆者同身邊朋友討論，大多都當係笑話，「亞視執笠？都預咗啦！」當中唯一喺傳媒行業工作嘅我，笑唔出不特止，更加悲憤交集；第二件事，係香港小國腳負中華台北1:3（圖），同身邊朋友討論，大家又係當笑話，「香港輸波？預咗啦！」我同佢哋最大嘅分別，唔只係做傳媒工作，仲要係做體育傳媒。結果，別人兩則笑話，對我來說是雙重打擊。
唔講唔知，小弟畢業後其實曾經喺亞視做過近三年編劇，當年以為冇人工加好慘；點知𠵱家新人連入行機會都冇！
兩年前有大型唱片店執笠，本欄曾說：「一個時代終結，都以一機構倒下作為象徵」，估唔到今日呢句說話又翻兜：香港已正式進入「一台時代」，亦係電視傳媒行業的冰河時期。我們電視人最感不值，是這行業不像唱片店被科技淘汰，而是被其他「一男子」因素人為整死。
至於小港腳們，對球壇無乜認知者可能以為「香港隊輸波有幾奇？」；但當你知道足球喺台灣只係「小眾娛樂」、頂級聯賽只屬業餘性質、更已逾半世紀未贏過香港，你就會明白「有啲比賽係唔可以輸」。我絕無怪責球員之意，佢哋付出咗血汗和時間為香港出賽，已經盡力；問題係香港足球嘅青訓同長遠發展，明顯已出現嚴重斷層。亞視死了，大家惟有寄望置之死地而後生；香港足球，恐怕會變成「下一間亞視」……
方栢翹
now足球評述員