facebook呢排都俾日本櫻花相洗版，除咗香港人，唔少強國人都東征，填詞人梁栢堅噚日都上傳咗張櫻花相，但重點係樹下位女士：「京都現場，發現大量北姑扮陀地，一睇佢襯衫就分得出。京都骨，從來只係中菜，同日本冇關。」
梁話，張相係朋友噚日喺京都影，「朋友仲話內地客喺京都表現嚇死人，和服着到不倫不類已經算小問題」。相中位女士着和服，但揹住個米老鼠（疑似）背囊，最頂癮係着波鞋（圖）！強國推崇國服，此女膽敢背祖忘宗，着鬼子服？唔少網友留言話不倫不類，但有啲話佢「侮辱日本文化來為國爭光」。
喺京都和服店工作嘅港人Crystal話，着和服但着波鞋又着羽絨，俾人覺得好奇怪。已取得「一級着付講師」資格嘅佢，話日本人着和服好嚴格。
#冷天着浴衣
但Crystal話京都噚日好凍、又落雨，如果仲着草履，隻襪濕咗腳會好凍，「呢個女仔其實唔算古怪」，佢話喺京都街頭見到有啲仲怪，有啲女仔着住件夏天浴衣，「凍死呀，日本人一睇就知你着錯」。當地和服店都會租和服俾旅客，收費大約2,500至6,000日圓（約160至380港元）。
費清都講番句公道話，京都骨唔係有心扮日本菜，京都係指首都，即係北京菜嚟。講完。（咁都唔夠公道？）
費清 ＃要生計，也要生活 ＃毋忘初衷