除咗「神奇小子」傅家俊即將榮升第二任父親，其實世界桌球壇不乏爸爸級名將。環顧目前世界排名前15位嘅球手，除咗丁俊暉、鄧立普、禾頓同梅菲，其餘11位都係爸爸級。現時世界一哥、英格蘭球手沙比（左），上年11月就同結婚四年嘅太太Vikki迎來首個愛情結晶品Sofia（右），初為人父嘅佢亦人逢喜事，日前擊敗威爾遜稱霸中國賽。要數囝囝好腳頭就首推三哥羅拔臣，佢喺2010年世錦賽決賽擊敗蘇格蘭球手杜慈，成為首位勇奪世界冠軍嘅澳洲球手後，挪威籍女友Mille亦隨即為佢誕下囝囝Alexander，喜上加喜。
桌壇當中更不乏「多仔公」，好似「火箭」奧蘇利雲同埋兩位蘇格蘭名將希堅斯、麥圭亞，分別都有三個仔女；而最近透露有意喺15/16球季復出、但只會亮相世錦賽及英錦賽等大賽嘅蘇格蘭七屆桌球世界冠軍亨特利，亦同前妻育有兩子。